السلام عليكم ورحمة الله وبركاتة
الحمد لله رب العالمين والصلاة والسلام علي رسول الله محمد صلي الله علية وسلم
ان شاء الله
انهاردة فكرة مشروع كان عندي فكرة وهي عمل اشكال من القماش والمشمع والوان مختلفة واشكال ورسومات وجيوب وجو وحركات تكون اغطية للكمبيوتر
1- غطا للشاشة
2- غطا للكيسة
3- غطا للوحة المفاتيح
واشكال بسوستة وزراير
نفسي الاخوات معانا في المنتدي يعملوا المشروع دة ويعلموا ربات البيوت والبنات وهما في المنزل يعملوا المشروع دة وان شاء الله نعرضة في جميع محلات بيع اجزاء واكسسوارات الكمبيوتر
كلنا وناس كتير جدا بتحب النظافة والجمال والشياكة
وكلنا بنخاف علي اجهزتنا الكهربائية وبالذات الكمبيوتر بتبقي مش عايز حد يلمسة ولا يجي جنبة
كلنا بنخاف علي اجهزتنا من التراب والعفرة وبالذات لما تفتح شباك او بلاكونة الغرفة الي بها جهاز الكمبيوتر او مثلا مش عاوز شعاع الشمس يجي علي الجهاز مش معقول تقولي سيب الجهاز يتشمس
حاسس ان شاء الله ان المشروع دة هينجح اوي واهو كلو احلام
عاوزين الاخوات تفكروا في اشكال والوان ورسومات كتير وتصميمات مختلفة
ان شاء الله عاوزين نغزو السوق المصري بالمشروع دة
اشكال من القماش والجلد والجبردين والجينز
ورسومات وتصميمات وزراير وسوستة وجو كدة
مش عارف حد فاهمني ولا متخيل الفكرة
اي حد فينا لما بيسافر اي حاجة لقرايبة مصيف حج عمرة سفر للعمل اي حاجة بيحب يغطي كل حاجة في البيت
فالاغطية دي بشكلها المتميز تحافظ علي الكمبيوتر علي الاقل خالص من العفرة والتراب
2- وكمان اي حد مننا وهو ماشي في الشارع بيبقي منظر الكيسة بتاع الكمبيوتر مش حلو اوي تخيلوا معايا انك تبقي شايل كيسة الكمبيوتر وعليها الاغطية والاشكال بتاعتنا وبسوستة وزراير وحركات
بتحافظ علي الكيسة من تراب او من تجريح وانتا راكب تاكسي ولا حاجة محدش يطرطش عليك ماية وانتا ماشي في الشارع تيجي علي الجهاز الكيسة يعني
3- بحلم ان شاء الله بعمل مصنع صغير وان شاء الله حبة حبة يكبر نعمل اشكال كتير
وان شاء الله نصدر المنتج العربي دة كمان للول العربية وفي كل انحاء العالم
نتميز بالسعر والجودة والاشكال المميزة
دة مفيش بيت تقريبا دلوقت الا وفية جهاز كمبيوتر وكل واحد نفسة يحافظ علي جهازة
بدل ما تغطية بقماشة اي كلام لا يبقي في اشكال ومقاسات للشاشة 17 والشاشة 19 والشاشة 20
4- نفسي ان شاء الله نعمل موقع في النت لبيع اغطية الكمبيوتر ونتفنن بقي
مش عارف هل دة خيال واحلام
ممكن حد يقولي يا عم انتا شاغل بالك كدة لية ما اي حتة قماش وغطي الجهاز وخاص انتا عامل فيلم ومن الحبة اوبا لية اقولة برضو معاك حق وجهة نظر
مش عارف رايكم انتو اية ؟
مع الجزء التاني من المشروع :
ان شاء الله نعمل مصنع ونجيب ماكينات خياطة ونشغل شباب كتير في المصنع محتاجين مكن للخياطة ومكان ولو شقة نضع بية المكن دة
وافكار وناس بتعرف تعمل تصميمات واشكال مختلفة بس المرة دي اغطية الكمبيوتر
الجزء التاني :
ان شاء الله بحلم نعمل في المصنع دة اغطية لكل حاجة
1- جرابات للموبايل
2- اغطية سيارات
3- غطاء البوتاجاز
4-0غطاء للسخان غطاء من قماش معين او شمع المهم لا يتاثر بالحرارة
5- غطاء للتلفزيون
6- غطاء للفديو
7- غطاء مشغل اسطوانات
8- غطاء للرسيفر
9- غطاء للميكروييف
10- غطاء للمسجل
11- اغطية ومفارش للطربيزات والسفرة
12- غطاء للتلاجة
عاوز نعمل اغطية لجميع الانواع وبجميع المقاسات واشكال جديدة ورسومات والوان جميلة تبقي زي الديكور كدة والوان تليق مع الوان الشقق
13- غطاء للغسالة الاتوماتيك
14- غطاء للغسالة العادية
وبيبقي معمول حساب مكان الوصلات والسلوك في الاجهزة نفسي في المشروع دة بشياكة وحاجة جميلة اوي واسعار في متناول الجميع
كلنا او اي حد فينا بالذات لما بنسافر بنبقي محتاجين نغطي الاجهزة الكهربايئة بالذات
15- لو نعرف نعمل اغطية للنجف العفش
16- غطاء حتي لكشاف الكهربا
17-غطاء للوحات الي بتبقي علي الحائط
18- غطاء للريموت كنترول
المشروع دة لاصحاب الذوق العالي والرفيع والناس الي بتحب الاتيكيت والشياكة ومهتمة بالديكور
اشكال الوان رسومات تصميمات قماشات من انواع مختلفة
يارب المصنع دة يتعمل
اية رايكم يا جماعة في المشروع دة او في المصنع دة او في الفكرة دي
حد مستعد يشاركنا شاركنا باي حاجة رايك
منتظر ارائكم افكاركم مقترحاتكم
عاوز تعمل انتا المشروع الف مبروك توكل علي الله
بس بجد لو ينفع نعملة كلنا سوا ونضع ايدنا في ايد بعض ونشغل ربات البيوت وبالذات في ناس كتير محتاجة لشغل بجد
لو حد يقدر يمول المشروع بالماكينات او المكان لاقامة المصنع
محتاجين تسويق جامد ونوزعة في المولات والمحلات وان شاء الله نعرض منتاجتنا
وان شاء الله المشروع ينجح
ولا دة احلام وخيال
لو حد شايف ان المشروع دة مش اوي او انة مينفعش وميمشيش في بلدنا يقولي انا مش هزعل ويبقي بدل ما نعمل المشروع علي الفاضي لو شايف ان المشروع في اسباب انة مينجحش قولي عليها الله يرضي عليك
الحمد لله
جزاكم الله كل خير
والسلام عليكم ورحمة الله وبركاتة
